Spænska íþróttadagblaðið AS segir að Andrés Iniesta, leikmaður Barcelona og spænska landsliðsins í knattspyrnu, sé búinn að taka ákvörðun um að yfirgefa Barcelona í sumar og fara til Kína.
Iniesta hefur áður sagt að þetta væri möguleiki en að hann myndi ákveða sig í lok apríl. Annaðhvort yrði hann um kyrrt í Barcelona eða flytti til Kína.
Blaðið segir að Barcelona viti af ákvörðun Iniesta sem muni ekki opinbera hana fyrr en eftir úrslitaleik Barcelona og Sevilla í spænsku bikarkeppninni á laugardaginn.
Þá segir AS að Iniesta muni skrifa undir þriggja ára samning við kínverskt félag en ekki sé vitað hvert félagið sé.
Iniesta er 33 ára gamall og á að baki 669 leiki með aðalliði Barcelona og mikinn fjölda titla.