Fernando Torres kvaddi uppeldisfélagið sitt, Atlético Madríd, með því að skora tvö mörk í síðasta leik sínum með liðinu. Mörk framherjans dugðu hins vegar ekki til sigurs því Atlético gerði 2:2-jafntefli við Eibar á heimavelli.
Leikurinn var liður í lokaumferð spænsku A-deildarinnar í fótbolta. Torres er algjör goðsögn hjá Atlético Madrid. Hann hóf feril sinn hjá liðinu og skoraði 82 mörk í 214 deildarleikjum á milli 2001-2007 áður en hann fór til Liverpool.
Torres snéri aftur til Atlético árið 2015 og og skoraði 27 mörk í 107 leikjum. Óvíst er hvert næsta skref Torres verður á ferlinum. Atlético endaði í 2. sæti deildarinnar með 79 stig.