Franski miðjumaðurinn Adrien Rabiot, leikmaður PSG, hefur neitað að vera á varalista franska landsliðsins fyrir heimsmeistaramótið í Rússlandi eftir að hafa ekki verið valinn í lokahópinn.
Landsliðsþjálfarinn Didier Deschamps hefur valið 23 manna lokahóp og var Rabiot ekki þar á meðal. Hinn 23 ára gamli miðjumaður var hins vegar á lista sem skilað var inn til FIFA og inniheldur þá leikmenn sem aðeins má kalla til fyrir HM ef eitthvað kemur upp á. Rabiot hefur hins vegar neitað að vera til taks.
„Vonbrigði hans gefa honum ekki leyfi til þess að gefast upp og neita að gera sitt fyrir Frakkland. Það að vera á meðal bestu leikmanna Frakklands eru forréttindi fyrir alla leikmenn. Hann hefur tekið slæma ákvörðun sem mun aðeins koma honum illa,“ er haft eftir Noel le Graet, forseta franska knattspyrnusambandsins.
23ja manna hópur Frakka:
Hugo Lloris, Steve Mandanda, Alphonse Areola, Djibril Sidibé, Benjamin Pavard, Raphaël Varane, Presnel Kimpembe, Adil Rami, Samuel Umtiti, Lucas Hernandez, Benjamin Mendy, Paul Pogba, N’Golo Kanté, Corentin Tolisso, Blaise Matuidi, Steven N’Zonzi, Thomas Lemar, Kylian Mbappé, Olivier Giroud, Antoine Griezmann, Ousmane Dembélé, Nabil Fékir, Florian Thauvin.