Spænska knattspyrnufélagið Real Madrid kynnti hinn 18 ára Vinicius Junior til leiks á Santiago Bernabeu-vellinum í gær en þessi ungi brasilíski sóknarmaður kemur frá Flamengo í heimalandinu.
Real borgaði 38,7 milljónir punda fyrir leikmanninn en enginn leikmaður undir 19 ára hefur kostað meira. Félagsskiptin voru samþykkt fyrir ári en gátu ekki gengið endanlega í gegn fyrr en Vinicius varð 18 ára.
Hann spilaði 37 leiki fyrir Flamengo á síðustu leiktíð og skoraði sjö mörk. Hann var kosinn besti maður mótsins, ásamt því að vera markahæstur, þegar Brasilía varð heimsmeistari U17 landsliða.