Fyrir nákvæmlega 50 árum, 18. september árið 1968, mættu 18.243 áhorfendur á fótboltaleik á Laugardalsvellinum og settu vallarmet sem stóð í 36 ár.
Stjörnum prýtt lið Benfica frá Portúgal heimsótti þá Valsmenn í fyrstu umferð Evrópukeppni meistaraliða en þetta var fyrri viðureign liðanna. Með Benfica léku nokkrir af bestu leikmönnum portúgalska landsliðsins, sem fékk bronsverðlaun á HM á Englandi 1966, en þeirra frægastur var framherjinn Eusébio, markakóngur HM, sem var í hópi bestu knattspyrnumanna heims um árabil og skoraði 580 mörk í 575 leikjum á ferlinum.
Valsmenn náðu þar bestu úrslitum íslensks félagsins til þess tíma, og lengi þar á eftir en leikurinn endaði 0:0 sem þótti nánast kraftaverk gegn slíku liði.
Sigurður Dagsson átti stórleik í marki Vals og mikið var fjallað um frammistöðu Páls Ragnarssonar sem gerði Eusébio nánast óvirkan í leiknum.
Auk þeirra léku þessir með Val í leiknum: Halldór Einarsson, Samúel Erlingsson, Þorsteinn Friðþjófsson, Bergsveinn Alfonsson, Sigurður Jónsson, Ingvar Elísson, Hermann Gunnarsson, Reynir Jónsson og Gunnsteinn Skúlason. Þjálfari Vals var Óli B. Jónsson.