Albert Guðmundsson átti góðan leik er AZ Alkmaar lagði Groningen að velli á útivelli í efstu deild Hollands í fótbolta í dag, 3:1. Albert var í byrjunarliði AZ og lagði upp annað mark liðsins á 76. mínútu.
Sóknarmaðurinn hefur nú leikið tvo leiki í byrjunarliði AZ og skorað í öðrum þeirra og lagt upp mark í hinum. Albert fór af velli í uppbótartíma með gult spjald á bakinu.
AZ er í fimmta sæti deildarinnar með ellefu stig, fimm stigum minna en topplið PSV, en Albert lék einmitt með PSV á síðustu leiktíð.