Heimir Guðjónsson og lærisveinar hans í HB frá Þórshöfn tryggðu sér í dag Færeyjameistaratitilinn í knattspyrnu.
HB vann í dag 2:1 útisigur á KÍ í Klaksvík og er með 16 stiga forskot í deildinni þegar fjórar umferðir eru eftir. Þetta var 23. meistaratitill HB og sá fyrsti í fimm ár.
Brynjar Hlöðversson lék allan tímann með HB í dag og Grétar Snær Gunnarsson lék síðasta hálftíma leiksins.
Heimir tók við þjálfun HB fyrir tímabilið og skrifaði á dögunum undir nýjan eins árs samning við félagið. Heimir er vanur því að vinna titla en undir hans stjórn varð FH fimm sinnum Íslandsmeistari og einu sinni bikarmeistari.