Franska knattspyrnutímaritið France Football hefur tilkynnt að það muni í fyrsta sinn í ár veita hin eftirsóttu verðlaun Ballon d‘Or, eða Gullboltann, í kvennaflokki. Markar það söguleg tímamót.
Viðurkenningin hefur verið veitt í karlaflokki nánast sleitulaust frá árinu 1956 eða í 62 ár. Viðurkenninguna fær sá knattspyrnumaður sem hefur þótt skara fram úr ár hvert og sigrar í kosningu íþróttafréttamanna frá öllum löndum Evrópu.
„Kvennaknattspyrna er í mikilli sókn og á skilið sömu virðingu og karlaknattspyrna. Kvennaboltinn er alltaf að stækka og meira en 760 milljónir manns horfðu á leiki frá heimsmeistaramóti kvenna árið 2015,“ er haft eftir Pascal Ferre, yfirritstjóra France Football.
Viðurkenningin verður veitt 3. desember í París. Í október verður opinberaður listi yfir 30 knattspyrnumenn, og nú 15 konur, sem efst eru í kjörinu.
Cristiano Ronaldo og Lionel Messi hafa einokað kjörið síðastliðinn áratug. Síðast árið 2007 vann einhver annar en þeir, en þá var það hinn brasilíski Kaká.