Gunnhildur Yrsa Jónsdóttir og Fanndís Friðriksdóttir, landsliðskonur í knattspyrnu, hafa samið við ástralska úrvalsdeildarliðið Adelaide United.
Fanndís staðfesti þetta í samtali við vefmiðilinn fótbolti.net. Fanndís gekk í raðir Vals fyrir í sumar frá franska liðinu Marseille og lék með Hliðarendaliðinu síðari hluta tímabilsins. Gunnhildur Yrsa hefur spilað með Utah Royals í Bandaríkjunum en hún fór til liðsins síðastliðinn vetur frá norska úrvalsdeildarliðinu Vålerenga.
„Þetta er mjög spennandi og tækifæri sem býðst ekki alltaf,“ segir Fanndís í viðtali við fótbolti.net en keppnistímabilið í Ástralíu hefst í lok október og lýkur í febrúar. Níu lið spila í áströlsku úrvalsdeildinni en á síðustu leiktíð hafnaði Adelaide United í neðsta sæti.