Koscielny hættur með franska landsliðinu

Laurent Koscielny, varnarmaður enska knattspyrnufélagsins Arsenal, hefur lagt landsliðsskóna á hilluna en þetta tilkynnti hann í kvöld. Koscielny, sem er 33 ára gamall, sleit hásin í leik Arsenal og Atlético Madrid í undanúrslitum Evrópudeildarinnar í apríl og missti þar af leiðandi af HM í Rússlandi í sumar.

Frakkar urðu heimsmeistarar eftir 4:2-sigur gegn Króatíu í úrslitaleik í Moskvu í sumar en Koscielny hafði gefið það út að hann ætlaði sér að hætta með landsliðinu eftir HM í Rússlandi. „Ég varð fyrir ákveðnum vonbrigðum með þjálfara franska liðsins, Didier Deschamps,“ sagði Koscielny í samtali við BBC í dag.

„Þegar þú ert að spila vel þá áttu marga vini. Þegar þú ert meiddur þá er fólk fljótt að gleyma þér. Deschamps hringdi í mig og óskaði mér til hamingju með afmælið í september en annars hef ég ekkert heyrt í honum. Það eru margir hjá Frakklandi sem hafa valdið mér vonbrigðum, ekki bara þjálfarinn,“ sagði pirraður Koscielny.

• Blogga um frétt