Serbneski knattspyrnumaðurinn Luka Jovic jafnaði afrek Atla Eðvaldssonar frá árinu 1983 þegar hann skoraði fimm mörk fyrir Eintracht Frankfurt í 7:1 sigri á Fortuna Düsseldorf í þýsku 1. deildinni í knattspyrnu í kvöld.
Jovic, sem er aðeins tvítugur, komst þar með í fámennan hóp leikmanna sem hafa skorað fimm mörk í leik í efstu deild Þýskalands en aðeins einu sinni hefur verið gert betur. Það var árið 1977 þegar Dieter Müller skoraði fimm mörk fyrir Köln í 7:2 sigri á Werder Bremen.
Þetta er í sautjánda skipti í sögu deildarinnar sem leikmaður skorar fimm mörk. Atli var fyrsti erlendi leikmaðurinn til að vinna það afrek á sínum tíma og svo skemmtilega vill til að þá áttu í hlut sömu lið og í kvöld. Atli skoraði nefnilega öll fimm mörk Fortuna Düsseldorf í 5:1 sigri á Eintracht Frankfurt 4. júní árið 1983.
Meðal þeirra sem eru jafnir Atla og Jovic með fimm mörk í leik í deildinni eru kappar á borð við Gerd Müller, sem lék þennan leik oftast allra, eða fimm sinnum, Jürgen Klinsmann, Dieter Höness, Jupp Heynckes og Robert Lewandowski.