Julen Lopetegui, knattspyrnustjóri Real Madrid, þykir afar valtur í sessi þessa dagana. Real Madrid er án sigurs í síðustu fimm leikjum sínum en liðið tapaði sínum öðrum deildarleik í röð í gær fyrir Levante á heimavelli, 2:1.
Real er í fimmta sæti spænsku 1. deildarinnar með 14 stig eftir fyrstu níu umferðirnar, fjórum stigum á eftir toppliði Barcelona. Spænskir fjölmiðlar greina frá því í dag að forráðamenn Real Madrid íhugi nú alvarlega að láta Lopetegui fara en hann tók við liðinu í sumar af Zinedine Zidane.
Antonio Conte, fyrrverandi knattspyrnustjóri Chelsea, er sterklega orðaður við stjórastöðuna hjá Real Madrid þessa dagana. Samkvæmt fjölmiðlum á Spáni setti Real Madrid sig í samband við Ítalann eftir tap liðsins gegn CSKA Moskvu í Meistaradeildinni í lok september.
Conte var rekinn sem knattspyrnustjóri Chelsea í sumar en hann gerði liðið að Englandsmeisturum á sínu fyrsta tímabili með liðið árið 2017. Þá gerði hann Juventus þrívegis að Ítalíumeisturum en Conte vill snúa aftur í þjálfun sem fyrst og er Real Madrid líklegur áfangastaður hjá knattspyrnustjóranum.