Ísland er gott varnarlið

„Í fyrri hálfleik leyfðum við íslenska liðinu að spila sinn leik of mikið,“ sagði Roberto Martinez, landsliðsþjálfari Belga, eftir sigur sinna manna gegn Íslendingum í Þjóðadeild UEFA í Brussel í kvöld.

Belgar þurftu að bíða fram á 65. mínútu til að brjóta á bak aftur sterkan varnarmúr íslenska liðsins en þá skoraði Michy Batshuayi og hann bætti svo við öðru marki á 81. mínútu leiksins.

„Fyrra markið var eitt það fallegasta sem þið sjáið í Þjóðadeildinni,“ sagði Martinez en hinn magnaði Eden Hazard var arkitektinn að því þegar hann átti gullfallega sendingu inn á Thomas Meunier sem sendi boltann í fyrstu snertingu á Batshuayi sem skoraði af stuttu færi.

„Þetta var erfiður leikur eins og við reiknuðum með. Ísland er gott varnarlið og hefur sýnt það á síðustu árin. Við þurfum að vera þolinmóðir og bíða þolinmóðir eftir færunum,“ sagði Martinez, sem hefur gert frábæra hluti með belgíska landsliðið.

• Blogga um frétt