Verðið að gera betur en Rússar

Gianni Infantino, forseti Alþjóðaknattspyrnusambandsins, FIFA, hefur komið þeim skilaboðum til Katara að fyrsta heimsmeistaramótið sem haldið verður í Mið-Austurlöndum verði að vera betra heldur en HM í Rússlandi í sumar en í dag eru fjögur ár þar til flautað verður til leiks á HM í Katar.

„Heimsmeistaramótið í Rússlandi var besta HM frá upphafi og HM 2022 verður að vera betra,“ sagði Infantino við fréttamenn en undirbúningurinn er í fullum gangi í Katar.

Átta leikvangar eru í byggingu í Katar og er talið að kostnaður við gerð þeirra verði 6,5 milljarðar dollara en talið er að Katar eyði 500 milljónum dollara á viku til að undirbúa heimsmeistaramótið.

FIFA hefur verið að gæla við að fjölga þjóðunum úr 32 í 48 sem taka þátt í úrslitakeppni HM eftir fjögur ár en það þykir þó líklegra að það verði áfram 32 lið sem keppa til úrslita um heimsmeistaratitilinn.

HM í Katar 2022 hefst 21. nóvember og lýkur með úrslitaleik 18. desember.

• Blogga um frétt