Helgi Kolviðsson hefur verið ráðinn landsliðsþjálfari Liechtenstein í knattspyrnu en frá þessu er greint á vef knattspyrnusambands Liechtenstein í dag.
Samningur Helga er til tveggja ára og tekur hann til starfa þann 1. janúar. Helgi var aðstoðarþjálfari íslenska karlalandsliðsins í tvö ár frá 2016-2018 en hann lét af störfum eins og Heimir Hallgrímsson eftir heimsmeistaramótið í Rússlandi í sumar.
Helgi tekur við þjálfun landsliðsins af Austurríkismanninum Rene Pauritsch og fyrsti leikur þess undir hans stjórn verður gegn Grikkjum í mars. Liechtenstein sem er í 181. sæti heimslistans er í riðli með Grikklandi, Ítalíu, Bosníu, Finnlandi og Armeníu í undankeppni EM 2020.
Helgi, sem er 47 ára gamall og lék 30 A-landsleiki, hefur þjálfað í Þýskalandi og Austurríki um árabil. Hann þjálfaði þýska liðið Pfullendorf og austurrísku liðin Austria Lustenau, Wiener Neustadt og Ried áður en hann tók við starfi aðstoðarlandsliðsþjálfara.