Ákveðið hefur verið að hætta leit að flugvélinni sem var með Emiliano Sala, nýjasta leikmann Cardiff, innanborðs en hennar hefur verið saknað eftir að hún hvarf af ratsjám á mánudagskvöld.

Þetta kemur fram í tilkynningu sem björgunaraðilar sendu frá sér nú síðdegis. Þar segir að um afar erfiða ákvörðun sé að ræða, en búið sé að leita á gríðarlega stóru svæði án þess að neitt hafi fundist. Leit hafi því verið hætt nema nýjar vísbendingar líti dagsins ljós.

„Þrátt fyrir að hafa leitað á stóru svæði, víða oftar en einu sinni, og greint gervihnattamyndir þá höfum við ekki fundið neitt sem gæti bent okkur á slóðina hvar flugvélina, flugmanninn eða farþegann væri að finna.

Við höfum leitað samtals í rúmlega 24 klukkustundir, alls flogið þremur flugvélum og fimm þyrlum í rúmlega 80 stundir og einnig haft báta að störfum. Við höfum farið vel yfir allar vísbendingar sem okkur hafa borist og höfum tekið þá erfiðu ákvörðun að hætta leit,“ segir í tilkynningu.

Þar kemur einnig fram að lífslíkur séu afskaplega litlar, en Sala var einn í vélinni ásamt flugmanninum David Ibbotson, 60 ára Englendingi.

„Aðstendur hafa verið látnir vita af þessari ákvörðun og hugur okkar er hjá fjölskyldum þeirra beggja á þessari erfiðu stundu. Þetta hefur verið mjög ítarleg leit og við viljum þakka fyrir veitta aðstoð. Þrátt fyrir að við séum ekki lengur að leita mun málið enn vera í rannsókn og við munum beina því til allra báta og flugvéla á svæðinu að hafa augun opin. Þau tilmæli munu alltaf gilda,“ segir í tilkynningu.

Tengdar fréttir

Emiliano Sala fórst í flugslysi

Sala varð fyrir gaseitrun í flugvélinni

• Handtaka í tengslum við andlát Sala
• Mynd af líki Sala í dreifingu
• Flugmaðurinn óhæfur í flugslysi Sala
• Flugið hlykkjótt undir það síðasta

» Fleiri tengdar fréttir

• Blogga um frétt