Chelsea er í fínum málum í einvígi sínu gegn PSG í átta liða úrslitum Meistaradeildar kvenna í fótbolta eftir 2:0-sigur á heimavelli sínum í kvöld. Hannah Blundell kom Chelsea yfir með marki á 73. mínútu og Erin Cuthbert bætti við marki á 88. mínútu og þar við sat.
Fyrir leik voru nokkrir stuðningsmenn PSG handteknir eftir að vopn og eiturlyf fundust í rútu þeirra á leið frá Frakklandi til London. Um 50 stuðningsmönnum var meinaður aðgangur að vellinum.
Höfðu einhverjir stuðningsmenn franska félagsins valdið skemmdum á Kingsmeadow-vellinum í morgun. Einhverjir stuðningsmannanna hafa áður fengið bönn frá karlaleikjum félagsins og eiga nú yfir höfði sér bann frá kvennaleikjum.