Ekki hafa komið neinar fréttir úr herbúðum sænska knattspyrnuliðsins Djurgården um að Kolbeinn Sigþórsson sé að verða leikmaður liðsins en vefsíðan Fótbolti.net greindi frá því í gær að Kolbeinn hafi fundað með forráðamönnum sænska liðsins í gær.
„Þetta eru nýjar upplýsingar fyrir mig. Ég get ekki staðfest að ég hafi hitt hann,“ sagði Bosse Andersson íþróttastjóri Djurgården í samtali við sænska blaðið Expressen.
Kolbeinn er laus allra mála frá Nantes í Frakklandi eftir að hafa verið þar frá árinu 2015 og ekkert fengið að spila á yfirstandandi keppnistímabili, í kjölfar langvarandi meiðsla þar á undan.