Ernesto Valverde, knattspyrnustjóri Barcelona, viðurkennir að sínir menn óttast liðsandann sem ríkir hjá Manchester United. Liðin mætast í Meistaradeild Evrópu í Barcelona annað kvöld.
Barcelona er með 1:0-forskot í einvíginu eftir sigur á Old Trafford í síðustu viku. United fór hins vegar áfram gegn PSG í 16-liða úrslitum, þrátt fyrir 2:0-tap á heimavelli í fyrri leik liðanna.
„Við óttumst liðsandann þeirra og við berum mikla virðingu fyrir þeim," sagði Valverde á blaðamannafundi í dag.
„Við verðum að eiga mjög góðan leik til að fara áfram. United er búið að vinna þrjá af fjórum útileikjum sínum í keppninni og tvo af þeim á lokamínútunum. Við verðum að passa það," bætti Valverde við.
Lionel Messi verður klár í slaginn, en hann lék ekki með Barcelona um helgina og blæddi úr honum eftir högg í fyrri leiknum við United. „Honum var smá brugðið en það er í lagi með hann og hann verður klár," sagði Valverde enn fremur.