Aron yfirgefur Werder Bremen

Þýska knattspyrnuliðið Werder Bremen hefur staðfest að Aron Jóhannsson yfirgefi liðið eftir leiktíðina og verður hann kvaddur fyrir síðasta leik liðsins gegn Leipzig á laugardaginn.

Aron hefur verið sérlega óheppinn með meiðsli frá því hann gekk í raðir Werder Bremen frá hollenska liðinu AZ Alkmaar fyrir fjórum árum.

Aron hefur ekkert komið við sögu með Bremen í deildinni á tímabilinu en á síðustu leiktíð lék hann tólf deildarleiki og skoraði í þeim eitt mark.

„Við munum kveðja Aron fyrir leikinn á laugardaginn. Hann hefur verið mjög óheppinn með meiðsli en hefur aldrei gefist upp og er alltaf í góðu skapi. Hann á skilið góðar kveðjur,“ segir Frank Baumann yfirmaður knattspyrnumála hjá Werder Bremen á twitter-síðu félagsins.

Aron er 28 ára gamall uppalinn Fjölnismaður. Hann hélt út í atvinnumennsku árið 2010 þegar hann gekk í raðir danska liðsins AGF. Þaðan fór hann til AZ Alkmaar og loks Werder Bremen. Aron lék 10 leiki með U21 árs landsliði Ísland og á að baki 19 leiki með bandaríska A-landsliðinu og hefur í þeim skorað 4 mörk.

💬 #Baumann:

"Wir werden @aronjo20 am Samstag kurz vor dem Spiel im #Weserstadion verabschieden. Er hatte eine Menge Pech, aber hat sich nie aufgegeben und immer gute Laune. Er hat den Rahmen verdient."#WerderPK #svwrbl

— SV Werder Bremen (@werderbremen) May 16, 2019

• Blogga um frétt