Bayern München er tvöfaldur meistari í þýska fótboltanum eftir 3:0-sigur á Leipzig í úrslitaleik bikarkeppninnar á Ólympíuleikvanginum í Berlín í dag. Bayern tryggði sér einnig þýska meistaratitilinn á dögunum.
Bayern byrjaði vel og pólski framherjinn Robert Lewandowski skoraði fyrsta markið á 29. mínútu og var staðan í hálfleik 1:0.
Kingsley Coman bætti við öðru marki á 78. mínútu og Lewandowski gulltryggði 3:0-sigur með sínu öðru marki á 85. mínútu.
Bayern München hefur nú unnið þýsku bikarkeppnina 19 sinnum, 13 sinnum oftar en Werder Bremen sem er með næstflesta þýska bikartitla.