Bandaríska fjölþjóðafyrirtækið Procter & Gamble, sem er eitt af styrktaraðilum bandaríska kvennalandsliðsins í knattspyrnu, hefur ákveðið að leggja sitt af mörkum til stuðnings liðinu í baráttu þess að fá sömu greiðslur og leikmenn karlalandsliðsins.
Procter & Gamble hefur ákveðið að greiða liðinu 529 þúsund dollara í bónusgreiðslur fyrir sigur þess á heimsmeistaramótinu en sú upphæð nemur um 69 milljónum króna. Allir 23 leikmenn liðsins fá 23 þúsund dollara, tæpar 3 milljónir, og í auglýsingu sem fyrirtækið birtir í blaðinu New York Times hvetur það bandaríska knattspyrnusambandið til að greiða leikmönnum kvennalandsliðsins sömu laun og karlaliðinu.
Leikmenn kvennalandsliðsins hafa lengi staðið í baráttu við knattspyrnusambandið og krafist sömu launa og leikmenn karlalandsliðsins, sem standa þeim langt að baki hvað varðar árangur á vellinum en fá mun hærri greiðslur fyrir þátttöku sína í landsliðsverkefnum.
Allir leikmennirnir í landsliðshópnum eru aðilar að málsókn á hendur knattspyrnusambandinu sem lögð var fram í mars á þessu ári.