Cristiano Ronaldo var heldur betur á skotskónum í gær er Portúgal hafði betur gegn Litháen á útivelli í undankeppni EM 2020, 5:1. Ronaldo skoraði fjögur af fimm mörkum Portúgals í leiknum.
Ronaldo hefur nú skorað 24 mörk í undankeppnum Evrópumóta, sem er nýtt met. Robbie Keane skoraði á sínum tíma 23 mörk í undankeppnum Evrópumóta með írska landsliðinu. Ronaldo hefur skorað níu mörk á lokamótum EM, jafnmörg og Michel Platini.
Portúgalinn hefur alls skorað 93 landsliðsmörk, 16 mörkum minna en heimsmethafinn Ali Daei, sem skoraði á sínum tíma 109 mörk fyrir íranska landsliðið.
Ronaldo hefur tvisvar skorað fjögur mörk í landsleik, en hann gerði slíkt hið sama gegn Andorra árið 2016. Hann hefur átta sinnum skorað þrjú mörk eða meira í sama landsleik.