Alþjóðegi íþróttadómstóllinn í Sviss hefur stytt leikbann brasilíska sóknarmannsins Neymars, leikmanns franska meistaraliðsins Paris SG.
Aganefnd evrópska knattspyrnusambandsins úrskurðaði Neymar í þriggja leikja bann í Meistaradeildinni eftir ummæli sem hann lét falla á samfélagsmiðlinum Instagram. Ummælin lét Neymar falla eftir 3:1-tap liðsins gegn Manchester United í seinni leik liðanna í sextán liða úrslitum keppninnar á Parc de Prince-vellinum í París á síðustu leiktíð.
PSG vann fyrri leik liðanna á Old Trafford 2:0 en United komast í átta liða úrslit keppninnar eftir að enska félagið fékk umdeilda vítaspyrnu á lokamínútum leiksins í París sem Marcus Rashford skoraði úr. Damir Skomina, dómari leiksins, studdist við VAR-myndbandsdómgæslu þegar hann dæmdi vítaspyrnu en dómarinn taldi að Presnel Kimpembe hefði handleikið knöttinn innan teigs.
Neymar var allt annað en sáttur með dóminn og lét til sín taka á Instagram en hann var ekki með PSG í leiknum vegna meiðsla. „Þetta er hneyksli! Það voru fjórir menn inni í einhverju herbergi, sem hafa ekki hundsvit á fótbolta, sem dæmdu hendi,“ skrifaði Neymar á Instagram-síðu sínu.
PSG og Neymar áfrýjuðu úrskurði UEFA til íþróttadómstólsins í Sviss og niðurstaða dómsins var að stytta leikbann Brasilíumannsins í tvo leiki. Neymar missir því af fyrstu tveimur leikjum Parísarliðsins í riðlakeppni Meistaradeildarinnar sem verða gegn Real Madrid og Galatasaray en hann mætir til leiks með sínum mönnum þegar þeir heimsækja Club Brügge 22. október.