Landsliðsfyrirliðinn Sara Björk Gunnarsdóttir skoraði tvö mörk fyrir topplið Wolfsburg í þýsku efstu deildinni í knattspyrnu í 3:0-sigri á Potsdam í dag.
Sara var sem fyrr í byrjunarliðinu og lék allan leikinn en hún kom gestunum yfir strax á þriðju mínútu og rak svo smiðshöggið á sigurinn með sínu öðru marki og þriðja marki liðsins á lokamínútu leiksins.
Wolfsburg er ríkjandi Þýskalandsmeistari og hefur titilvörnina vel. Liðið er með fullt hús stiga eftir fjórar umferðir.