Cristiano Ronaldo verður fjarri góðu gamni með Ítalíumeisturum Juventus annað kvöld þegar þeir sækja Brescia heim í ítölsku A-deildinni í knattspyrnu.
Ronaldo glímir við smávægileg meiðsli í læri og var sú ákvörðun tekin að hvíla Portúgalann snjalla annað kvöld.
Með sigri fer Juventus á topp deildarinnar, en liðið er tveimur stigum á eftir toppliði Inter eftir fjórar umferðir.
Ítalski sóknarmaðurinn Mario Balotelli leikur fyrsta leik sinn með Brescia annað kvöld, en þessi skrautlegi leikmaður kom til liðsins frá franska liðinu Marseille í sumar.