Hinn 72 ára gamli Óscar Tabárez varð í nótt fyrsti landsliðsþjálfari karlaliðs í fótbolta til að stýra sama landsliði í 200 leiki. Tabárez stýrði þá Úrúgvæ í 1:1-jafntefli gegn Perú í vináttuleik.
Tabárez varð leikjahæsti landsliðsþjálfari heims árið 2017 er hann stýrði Úrúgvæ í 168. skipti. Síðan þá hefur hann bætt eigið heimsmet með hverjum leik.
Joachim Löw hefur stýrt Þýskalandi í 179 leikjum og er hann í öðru sæti yfir landsliðsþjálfara með flesta leiki hjá sama liði.
Tabárez tók við Úrúgvæ árið 2006 og vann hann Ameríkubikarinn árið 2011 og fór alla leið í undanúrslit á HM 2010. Undir hans stjórn hefur Úrúgvæ unnið 97 leiki, gert 51 jafntefli og tapað 52 leikjum.