Búlgarska fótbolta goðsögnin Hristo Stoichkov brotnaði niður og felldi tár þegar hann ræddi um skammarlega hegðun stuðningsmanna búlgarska landsliðsins í knattspyrnu sem voru með kynþáttaníð í garð leikmanna enska landsliðsins í viðureign Búlgaríu og Englands í undankeppni EM í vikunni.
Leikur Búlgara og Englendinga var í tvígang stöðvaður vegna rasisma búlgarskra stuðningsmanna og eiga Búlgarar yfir höfði sér refsingu frá evrópska knattspyrnusambandinu.
Stoichkov, sem lék 83 leiki með Búlgaríu á árunum 1986-1999, var í viðtali á spænskri sjónvarpsstöð þar sem málið var til umfjöllunar.
Þegar Stoichkov var spurður um hver lausnin á kynþáttafordómum ætti að vera sagði hann:
„Ekki að leyfa stuðningsmönnunum að koma á völlinn eða beita jafnvel þyngri refsingu,“ sagði Stoichkov áður en hann brast í grát.
Stoichkov er einn besti knattspyrnumaður Búlgaríu frá upphafi. Hann lék í nokkur ár með Barcelona og var útnefndur knattspyrnumaður ársins í Evrópu árið 1994 eftir að Búlgaría hafnaði í 3. sæti á HM.
Bulgaria legend Hristo Stoichkov breaks down in tears on TV and says his country should be handed a long-term ban from football after England's black players were subjected to racist chants and monkey noises from the home fans. pic.twitter.com/OmA7pGodVf
— Oluwashina Okeleji (@oluwashina) October 16, 2019