Tekin hefur verið ákvörðun um að fresta viðureign Barcelona og Real Madrid sem áttu að mætast á Camp Nou laugardaginn 26. október.
Ástæðan er sú að róstursamt hefur verið í Barcelona undanfarna daga þar sem tugþúsundir hafa mótmælt fangelsisdómum leiðtoga aðskilnaðarsinna.
Félögin samþykktu bæði að fresta leiknum og greinir spænska knattspyrnusambandið frá því á vef sínum að þau hafi frest fram á mánudagsmorgun til að ákveða nýjan leikdag. Takist þeim ekki að ná samkomulagi um leiktíma mun mótanefnd spænska knattspyrnusambandsins finna nýja dagsetningu og hefur desember verið nefndur í því sambandi.