Sveinn Aron Guðjohnsen er í liði vikunnar í ítölsku B-deildinni í knattspyrnu eftir magnaða innkomu hans í liði Spezia gegn Pescara í leik liðanna á laugardaginn.
Sveinn Aron kom inn á sem varamaður á 61. mínútu þegar Spezia var að tapa 1:0 en átta mínútum eftir að hann kom inn á lagði hann upp jöfnunarmark. Þremur mínútum síðar skoraði hann svo sjálfur sigurmarkið, 2:1. Þessi frammistaða skilaði honum sæti í liði vikunnar hjá ítalska fjölmiðlinum Gazetta della Spezia.
Sveinn hefur átt erfitt uppdráttar hjá Spezia síðan hann gekk í raðir félagsins frá Breiðabliki fyrir síðustu leiktíð og er markið það fyrsta sem hann skorar fyrir liðið. Sveinn var að leika sinn fyrsta leik á tímabilinu, en hann hefur þurft að verma varamannabekkinn á tímabilinu til þessa.