Liverpool vann sannfærandi 4:1-sigur á Genk frá Belgíu á útivelli í Meistaradeild Evrópu í fótbolta í kvöld. Alex Oxlade-Chamberlain kom Liverpool í 2:0, áður en Sadio Mané og Mo Salah bættu við mörkum á síðasta kortérinu. Stephen Odey klóraði í bakkann fyrir Genk í lokin.
Napoli er á toppi riðilsins með sjö stig eftir 3:2-sigur á RB Salzburg í hörkuleik í Austurríki. Dries Mertens kom Napoli tvisvar yfir í leiknum en í bæði skiptin jafnaði Norðmaðurinn Erling Braut Håland. Lorenzo Insigne skoraði hins vegar sigurmarkið stundarfjórðungi fyrir leikslok.
Barcelona lenti í erfiðleikum í Tékklandi er liðið heimsótti Slavia Prag. Lionel Messi kom Barcelona yfir á þriðju mínútu en Jan Boril jafnaði fyrir Slavia snemma í seinni hálfleik. Sigurmark Barcelona kom hins vegar á 57. mínútu og var það sjálfmark.
Þá vann Inter sterkan 2:0-sigur á Dortmund á heimavelli. Lautaro Martínez og Antonio Candreva skoruðu mörk Inter hvor í sínum hálfleiknum. Barcelona er á toppi riðilsins með sjö stig og Inter og Dortmund eru með fjögur.
Inter - Dortmund 2:0
Martínez 22. Candreva 89.
Lille - Valencia 1:1
Okoné 90. -- Cheryshev 63.
RB Salzburg - Napoli 2:3
Håland 40., (víti) 72. -- Mertens 17., 64. Insigne 73.
Benfica - Lyon 2:1
Silva 4., Pizzi 85. -- Depay 70.
Slavia Prag - Barcelona 1:2
Boril 50. -- Messi 3., sjálfsmark 57.