„Ég veit ekki hvort Meistaradeildin saknaði mín, en ég saknaði hennar,“ sagði kampakátur Alex Oxlade-Chamberlain við BT-sjónvarpsstöðina eftir 4:1-sigur Liverpool á Genk í Meistaradeild Evrópu í fótbolta í kvöld.
Oxlade-Chamberlain spilaði sinn fyrsta leik í keppninni í 18 mánuði í dag og fagnaði því með því að skora tvö fyrstu mörk Liverpool í kvöld. Hann fylgist með liðsfélögum sínum vinna keppnina á síðustu leiktíð.
„Það var gott að spila í Evrópukeppni aftur og það er alltaf sérstök tilfinning. Það var mjög gaman að fylgjast með strákunum á síðustu leiktíð og vera á bekknum undir lokin og sjá liðið vinna bikarinn.
Það er ánægjulegt að vera í byrjunarliðinu í kvöld og aukabónus að skora tvö mörk. Við verðum hins vegar að spila betur ef við ætlum okkur langt í keppninni. Við eigum mikið inni, þrátt fyrir að við séum að ná í úrslit, sem er jákvætt,“ sagði miðjumaðurinn.