Fátt gengur upp hjá Diego Costa á knattspyrnuvellinum með Atlético Madrid eftir að hann sneri aftur til Spánar frá Englandi. Costa glímir nú við meiðsli í hálsinum og gæti verið lengi frá.
Costa hefur fundið fyrir verkjum í hálsinum og í efri hlutanum í bakinu. Samkvæmt AP-fréttaveitunni fór hann í myndatöku í gær sem kom ekki vel út.
Ekki hefur hins vegar verið tekin ákvörðun um hvort hann fari í aðgerð eða hvernig aðgerð. Í versta falli gæti Costa verið frá næstu þrjá mánuðina.
Toppbaráttan á Spáni er óvenjujöfn sem stendur og Atlético fær því gott tækifæri til þess að verða spænskur meistari en liðið er stigi á eftir risunum Barcelona og Real Madrid. Rétt eins og Sevilla.