Þorlákur Árnason, yfirmaður knattspyrnumála hjá knattspyrnusambandi Hong Kong, tók í gær við viðurkenningu frá Knattspyrnusambandi Asíu, AFC, vegna góðrar uppbyggingar á fótboltanum í landinu.
Hong Kong fékk viðurkenninguna sem sú Asíuþjóð sem var með bestu uppbygginguna á árinu 2019, hvað varðar grasrótina, yngri flokkana og yngri landslið þjóðarinnar en verðlaunahófið fór fram í landinu.
Þorlákur tók við starfi yfirmanns knattspyrnumála í byrjun þessa árs og var ráðinn til tveggja ára.
Hong Kong fékk einnig tilnefningu til verðlauna fyrir grasrótarstarf í fótbolta en þar sigraði Singapúr.
Við sama tækifæri var Son Heung-min, leikmaður Tottenham og Suður-Kóreu, útnefndur knattspyrnumaður ársins 2019 í Asíu og Saki Kumagai, leikmaður Evrópumeistara Lyon og Japan, var útnefnd knattspyrnukona ársins.