Berglind Björg Þorvaldsdóttir, landsliðskona í knattspyrnu, hefur gert lánssamning við stórliðið AC Mílan á Ítalíu.
Berglind Björg mun klára tímabilið með AC Milan og snúa aftur til Íslands um miðjan maí. Hún mun því missa af fyrstu tveimur leikjum tímabilsins með Breiðabliki, gegn FH og Selfossi, en þessi 27 ára gamli framherji varð markahæsti leikmaður úrvalsdeildarinnar á síðustu leiktíð með 16 mörk í sautján leikjum.
Alls hefur hún skorað 125 mörk í 181 leik í efstu deild. Þá hefur hún skorað fjögur mörk í 44 landsleikjum.
Berglind þekkir ítölsku A-deildina ágætlega eftir að hafa spilað átta leiki með Verona árið 2017. Sú dvöl reyndist hins vegar hálfgerð martröð á endanum þar sem ekki var staðið við gerða samninga. Berglind fór einnig á láni á síðustu leiktíð þegar hún samdi við hollenska úrvalsdeildarliðið PSV og sneri hún þá aftur til Íslands fyrir tímabilið hér heima.