Victor Moses er genginn til liðs við ítalska knattspyrnufélagið Inter Mílanó en þetta staðfesti félagið á Twitter-síðu sinni í dag. Moses skrifar undir lánssamning sem gildir út tímabilið en hann kemur til félagsins frá Chelsea. Inter á svo forkaupsrétt næsta sumar á þessum 29 ára gamla kantmanni.
Moses gekk til liðs við Chelsea árið 2012 þegar hann kom frá Wigan Athletic. Honum tókst hins vegar aldrei að festa sig í sessi hjá félaginu, nema undir stjórn Antonio Conte, sem nú stýrir Inter Mílanó. Saman unnu þeir ensku úrvalsdeildina tímabilið 2016-17, og ensku bikarkeppnina ári síðar.
Moses var lykilmaður í liði Chelsea þegar Conte var við stjórnvölinn á Stamford Bridge en þegar Ítalinn var rekinn frá Chelsea, sumarið 2018, missti Moses sæti sitt í liðinu. Hann hefur verið lánaður til Liverpool, Stoke, West Ham og nú síðast Fenerbahce í Tyrklandi á tíma sínum hjá Chelsea en hann á að baki 38 landsleiki fyrir Nígeríu.