Spænska knattspyrnufélagið Barcelona gekk í dag frá kaupum á danska framherjanum Martin Braithwaite frá Leganés á 18 milljónir evra. Leikmaðurinn samdi til sumarsins 2024.
Barcelona fékk sérstakt leyfi til að kaupa framherja innan Spánar, þar sem Luis Suárez og Ousmane Dembélé eru að glíma við meiðsli.
Braithwaite má bara spila í spænsku deildinni það sem eftir lifir leiktíðar, þar sem Barcelona hefur þegar skilað inn leikmannalista fyrir Meistaradeildina. Danski framherjinn lék með enska liðinu Middlesbrough en skoraði aðeins níu mörk í 36 leikjum í ensku B-deildinni.
Daninn hefur skoraði sex mörk í 19 leikjum með Leganés á tímabilinu og sjö mörk í 39 landsleikjum með Dönum.