Knattspyrnumaðurinn Alfons Sampsted skrifaði í dag undir þriggja ára samning við norska félagið Bodø/Glimt. Var hann keyptur frá sænska liðinu Norrköping.
Bodø/Glimt hafnaði í öðru sæti norsku deildarinnar á síðustu leiktíð og mun því spila í undankeppni Evrópudeildarinnar í sumar. Oliver Sigurjónsson, Birkir Bjarnason, Hannes Þór Halldórsson, Anthony Karl Gregory og Kristján Jónsson hafa áður leikið með liðinu.
Alfons lék með Breiðabliki áður en hann var keyptur til Norrköping árið 2017. Honum gekk illa að festa sig í sessi hjá Norrköping og var hann þrívegis lánaður í sænsku neðri deildirnar; tvisvar til Sylvia og einu sinni til Landskrona.
Hann var svo lánaður aftur til Breiðabliks seinni hluta síðasta sumars og skoraði eitt mark í átta deildarleikjum. Alfons lék sína fyrstu A-landsleiki gegn Kanada og El Salvador í Bandaríkjunum í síðasta mánuði.
„Þetta er góð tilfinning og ég hef rætt við Oliver Sigurjónsson og hann sagði góða hluti um félagið. Ég held þetta sé gott skref fyrir mig. Ég mun gera allt sem ég get til að hjálpa liðinu og á sama tíma bæta mig sem leikmaður,“ sagði Alfons í viðtali sem birtist á heimasíðu nýja félagsins.