Timo Werner, framherji þýska knattspyrnufélagsins RB Leipzig hefur verið sterklega orðaður við Liverpool að undanförnu og hann var ekkert sjálfur að slá af sögusögnunum í viðtölum við blaðamenn eftir að hafa skorað sigurmark Leipzig gegn Tottenham í Meistaradeild Evrópu í gærkvöldi.
Werner, 23 ára, skoraði 26. mark sitt á tímabilinu í Lundúnum í gær og var honum nýlega hrósað í hástert af Jürgen Klopp, knattspyrnustjóra Liverpool. Eftir leikinn í gær var Werner spurður út í ummæli Klopp og stóð ekki á svörum.
„Liverpool er besta lið í heimi þessa stundina og þegar þú ert orðaður við það lið er það mikill heiður,“ sagði hann við Viasport.
Werner hefur skorað 11 mörk í 29 landsleikjum fyrir þýska landsliðið og er talinn vera einn efnilegasti framherji Evrópu.