Knattspyrnumaðurinn Kolbeinn Sigþórsson verður ekki með AIK gegn Örgryte í sænska bikarnum á morgun. Framherjinn hefur verið að glíma við meiðsli og veikindi á nýju ári.
Rikard Norling, þjálfari hans hjá AIK, staðfesti tíðindin við Expressen í dag. „Hann er ekki klár þar sem hann er enn ekki byrjaður að æfa á fullu á nýjan leik,“ sagði Norling.
Kolbeinn er nálægt því að vera klár í slaginn og gæti hann leikið gegn Kalmar í bikarnum mánudaginn 9. mars. Sænska deildin hefst snemma í apríl og er fyrsti leikur Kolbeins og félaga gegn BK Häcken á útivelli 6. apríl.