Stærsta áskorun knattspyrnusögunnar

Andrea Agnelli, stjórnarformaður Ítalíumeistara Juventus í knattspyrnu, segir að knattspyrnuheimurinn standi nú frammi fyrir sinni stærstu áskorun í sögunni vegna kórónuveirufaraldsins sem nú herjar á heimsbyggðina. Öllum stærstu deildarkeppnum innan Evrópu hefur verið frestað um óákveðinn tíma vegna veirunnar.

Til stóð að ítalska A-deildin myndi hefjast þann 3. maí næstkomandi en í vikunni var hætt snögglega við þau plön enda Ítalíu það land sem hefur orðið verst úti vegna kórónuveirunnar. Alls eru rúmlega 86.500 manns smituð af veirunni þar í landi og þá hafa rúmlega 9.000 manns látist af völdum hennar.

„Við sem stýrum okkar félögum erum ábyrgir fyrir heilsu þeirra sem þar starfa.“ sagði Agnelli í samtali við ítalska fjölmiðla. „Fótboltinn er nú í algjörri biðstöðu sem þýðir líka að engar tekjur eru að skila sér inn til félaganna. Ástandið sem nú ríkir vegna kórónuveirunnar er stærsta áskorun knattspyrnusögunnar,“ bætti stjórnarformaðurinn við.

• Blogga um frétt