Hvítrússneska úrvalsdeildin í knattspyrnu er eina deildin í Evrópu þar sem ennþá er spilaður fótbolti en önnur lönd hafa frestað sínum deildakeppnum um óákveðinn tíma vegna kórónuveirunnar.
Íslendingurinn Willum Þór Willumsson spilar í deildinni og skoraði fyrir lið sitt BATE í 2:1-ósigri á Slavia Mozyr í gær en deildin er orðin óvenju vinsæl. Lið frá Hvíta-Rússlandi komast sjaldan langt í Evrópukeppnum og spila engir af bestu leikmönnum heims þar í landi.
Engu að síður hefur hvítrússneska knattspyrnusambandið gert tíu nýja sjónvarpssamninga við erlendar stöðvar sem leita að efni til að sýna áskrifendum sínum. Um tíu milljón manns búa í Hvíta-Rússlandi en aðeins 94 hafa greinst með kórónuveiruna og segist knattspyrnusambandið þar í landi ætla halda áfram að spila fótbolta.
Áhorfendur eru hitamældir þegar þeir mæta á völlinn og þá hefur forseti landsins, Alexander Lukashenko, gert lítið úr alvarleika veirunnar. „Það er betra að deyja standandi en að lifa á hnjánum,“ sagði hann við sjónvarpsmenn eftir að hafa spilað íshokkí og faðmað aðra leikmenn í kringum sig.