Birkir Bjarnason, landsliðsmaður Íslands í knattspyrnu og leikmaður Brescia í ítölsku A-deildinni, hefur ekki farið mikið út úr húsi undanfarnar vikur vegna kórónuveirunnar sem nú herjar á heimsbyggðina.
Birkir, sem er 31 árs gamall, býr í Brescia, rúmlega 200 þúsund manna borg í Langbarðalandi í norðurhluta Ítalíu. Ítalía er það Evrópuland sem hefur farið verst úr út úr veirunni en alls hafa tæplega 106 þúsund manns greinst með veiruna þar í landi og þar af eru 12.428 látnir vegna hennar.
Kórónuveirufaraldurinn hefur leikið íbúa Langbarðalands grátt en þar hafa flest smitin í landinu verið staðfest og ríkir algjört útgöngubann í héraðinu þessa dagana.
„Ástandið hérna er ekki gott, það verður bara að segjast,“ sagði Birkir í samtali við Morgunblaðið í gær. Göturnar hér eru nánast allar auðar og borgin minnir um margt á draugabæ þessa dagana. Það hefur ríkt útgöngubann hérna undanfarnar þrjár vikur og fólk virðir það. Þú mátt fara út í apótek og matvörubúð til þess að kaupa nauðsynjavörur en yfirvöld vilja að fólk fari eins sjaldan út og kostur er. Maður á í raun bara að fara í mesta lagi einu sinni í viku út í búð en annars er maður bara læstur inni í íbúð.“
Viðtalið í heild sinni má sjá á íþróttasíðum Morgunblaðsins í dag.