Lætur spænska fjölmiðla heyra það

Luis Suarez er frá vegna meiðsla en hann tók á …
Luis Suarez er frá vegna meiðsla en hann tók á sig 70% launalækkun á dögunum vegna kórónuveirunnar. AFP

Luis Suárez, framherji spænska knattspyrnuliðsins Barcelona, er ósáttur með spænska fjölmiðla þessa dagana. Allir starfsmenn Barcelona þurftu að taka á sig launalækkun á dögunum vegna kórónuveirunnar sem nú herjar á heimsyggðina. Allt íþróttastarf innan félagsins liggur niðri og því er innkoman hjá félaginu lítil sem engin þessa dagana.

Allir starfsmenn félagsins samþykktu að taka á sig 70% launalækkun í síðustu viku en spænskir fjölmiðlar greindu frá því að leikmenn karlaliðs félagsins hafi verið á móti lækkuninni. „Það hefur verið mikið talað um launalækkanir karlaliðsins að undanförnu og það hafa verið skrifaðir hlutir í blöðin sem eru hrein og bein lygi,“ sagði Suárez í samtali við spænska fjölmiðla.

„Það hefur verið talað um skilmála sem leikmenn knattspyrnuliðs Barcelona eiga að hafa sett fram. Þá eigum við að hafa verið á móti því að skerða launin okkar um 70% á meðan aðrir innan félagsins hafi þurft að taka á sig þessa lækkun. Við gerðum allt til þess að finna lausn á málinu og vorum boðnir og búnir að taka á okkur lækkun.“

„Það var enginn leikmaður liðsins sem neitaði því að taka á sig launalækkun. Við komumst að samkomulagi strax og það voru svo fyrirliðarnir sem gengu á fund forsetans og kláruðu samningaviðræðurnar. Svona umræða getur verið særandi og það er lágmark að fólk vinni heimavinnuna sína þegar svona er skrifað,“ bætti Suárez við.

mbl.is