Það eru akkúrat sjö ár síðan Gylfi Þór Sigurðsson skoraði glæsilegt mark í Evrópudeildinni í knattspyrnu og hélt vonum Tottenham á lífi í fjórðungsúrslitum keppninnar.
Gylfi var á sinni fyrstu leiktíð með Tottenham en hann spilaði 48 leiki og skoraði sjö mörk fyrir liðið þann veturinn. Fjórða apríl 2013 tók Tottenham á móti Basel í fyrri viðureign liðanna í fjórðungsúrslitum Evrópudeildarinnar á White Hart Lane, þáverandi heimavelli Lundúnaliðsins.
Svissnesku meistararnir komust óvænt í tveggja marka forystu á fyrstu 35 mínútum leiksins en hinn margreyndi framherji Emmanuel Adebayor minnkaði muninn fyrir leikhlé. Snemma í síðari hálfleik jafnaði Gylfi svo metin með bylmingsskoti fyrir utan vítateig, sem fór af varnarmanni og upp í nærhornið.
Leiknum lauk með 2:2-jafntefli, sem og seinni viðureigninni í Basel þar sem heimamenn fóru að lokum áfram eftir vítaspyrnukeppni. Þetta glæsimark Gylfa má sjá í spilaranum hér að neðan en twittersíða Evrópudeildarinnar rifjaði það upp.
Gylfi Sigurdsson cuts inside & finds the net in style 😎#OTD in 2013 #UEL | @SpursOfficial pic.twitter.com/VD6btC1qCU
— UEFA Europa League (@EuropaLeague) April 4, 2020