Fyrrverandi besti knattspyrnumaður heims, Ronaldinho, var látinn laus úr fangelsi í Paragvæ í vikunni eftir að hafa verið tekinn með falsað vegabréf þar í landi í síðasta mánuði. Samfangar kappans eru sagðir hafa kvatt hann með tárvot augu.
Ronaldinho og bróðir hans Roberto Assis voru vistaðir í fangelsinu frá 6. mars en borguðu að lokum hvor sína 800 þúsund dollarana, eða um 114 milljónir króna, í tryggingu gegn því að verða látnir lausir úr fangaklefa.
Brasilíumaðurinn átti glæstan knattspyrnuferil og var meðal annars valinn besti leikmaður heims árið 2005 þegar hann spilaði með Barcelona. Hann var vinsæll meðal fanganna og spilaði með þeim fótbolta daglega samkvæmt heimildum ESPN en samfangar hans héldu grillveislu til að kveðja hann. Segir heimildarmaður fréttastofunnar að kappinn hafi lofað að heimsækja þá síðar.
Ronaldinho hefur átt í miklum fjárhagserfiðleikum eftir að hann lagði skóna á hilluna og því margir undrandi á að hann hafi greitt svo háa upphæð. Er hann sagður skulda jafnvirði um 305 milljóna króna í umhverfisgjöld eftir að hafa látið byggja bryggju með ólöglegum hætti við hús sitt sem liggur að vatni í Porto Alegre. Aðrar skuldir Ronaldinhos nema 250 milljónum króna.