Jerzey Dudek, fyrrverandi markvörður Liverpool, var hársbreidd frá því að leggja hendur á þáverandi knattspyrnustjóra sinn, Rafael Benítez, þegar hann frétti að honum ætti að skipta út sem aðalmarkverði liðsins.
Dudek vann sér sess í hjörtum Liverpool-manna árið 2005 þegar hann var hetja liðsins í úrslitaleik Meistaradeildar Evrópu gegn AC Milan í Istanbúl í Tyrklandi. Pólverjinn fékk á sig þrjú mörk í fyrri hálfleik en, eftir að samherjar hans jöfnuðu metin og kreistu framlengingu, varði hann tvisvar í vítaspyrnukeppninni.
Sumarið eftir festi Benítez kaup á Spánverjanum Pepe Reina og gerði samlanda sinn að markverði númer eitt, ákvörðun sem gerði Dudek einkar gramt í geði. „Pepe var frábær náungi en Rafa keypti hann, nýjan markvörð, þegar ég var á toppi ferilsins,“ sagði Dudek í viðtali við FourFourTwo um helgina en hann hafði svipaða sögu að segja í ævisögu sinni fyrir nokkrum árum.
„Ég var hetjan í Istanbul og ég trúði því ekki að ég ætti í kjölfarið að vera varamarkvörður sem ætti að vera til taks. Ég var algerlega brjálaður út í Benitez og það var djöfulleg rödd í höfði mínu sem hvatti mig til þess að kýla hann í andlitið. Sem betur fer lét ég ekki verða af því, það hefði líklega ekki litið vel út á ferilskránni,“ sagði Dudek í ævisögu sinni.