Þeim fjórum knattspyrnumönnum sem minntust George Floyd í leikjum í þýsku efstu deildinni í knattspyrnu um helgina verður ekki refsað en þýska knattspyrnusambandið hefur staðfest þetta.
Í gær var sagt frá því að sambandið væri að skoða mál fjórmenninganna sem minntust Floyd með táknrænum hætti en hann var drepinn af lögreglumanni sem kraup á hálsi hans og þrengdi þannig að öndunarvegi hans þangað til hann kafnaði. Miklar óeirðir hafa verið í Bandaríkjunum undanfarna daga vegna atburðarins þar sem fólk mótmælir ítrekuðum drápum á svörtu fólki.
Weston McKennie, sem spilar fyrir Schalke, Marcus Thuram, Borussia Mönchengladbach, Jadon Sancho og Achraf Hakimi sem spila með Dortmund. McKennie spilaði leik Schalke með armband sem á stóð „réttlæti fyrir George“ og þeir Sancho og Hakimi voru í stuttermabolum innanundir keppnistreyjunni með sömu skilaboðum. Þá kraup Thuram á hné eftir að hann skoraði í sigri Gladbach á Union Berlín.
Þó þeir hafi mögulega strangt til tekið brotið reglur er varða að koma pólitískum skilaboðum áleiðis í knattspyrnuleik, mun sambandið ekki aðhafast frekar í málinu. IFA hefur einnig gefið út tilkynningu og biðlað til allra sérsambanda um að sýna nærgætni í svona málum, jafnvel þó reglurnar segi að athafnirnar séu strangt til tekið bannaðar. Segir að mótshaldarar verði að „skoða heildarsamhengið“ áður en þeir taka ákvörðun um að refsa leikmönnum.