Fréttir af félagsskiptum þýska knattspyrnumannsins Timo Werner til enska úrvalsdeildarfélagsins Chelsea frá Leipzig í Þýskalandi bárust í vikunni. BBC greindi m.a. frá því að félögin hafi samþykkt 54 milljónir punda kaupverð á framherjanum.
Er Liverpool eitt þeirra félaga sem lengi hafa fylgst með Werner, en samkvæmt enskum fjölmiðlum er hann á leiðinni til Chelsea. Oliver Mintzlaff, yfirmaður íþróttamála hjá Leipzig, segir hins vegar ekkert samkomulag í höfn.
„Við höfum ekki samþykkt kaupverð við neitt félag og við höfum ekki heyrt í neinu félagi varðandi Timo Werner. Werner sjálfur ræður næsta skrefi hjá sér, ekki félagið,“ sagði Mintzlaff við Sky í Þýskalandi.
Hefur Werner skorað 75 mörk í 123 deildarleikjum með Leipzig og 11 mörk í 29 landsleikjum með Þýskalandi.