Ísak Bergmann Jóhannesson, Skagamaðurinn ungi sem leikur með Norrköping, lagði upp tvö af mörkum liðsins í 4:2-útisigri gegn Östersund í sænsku úrvalsdeildinni í knattspyrnu í gær. Þetta var hans fyrsti byrjunarliðsleikur með liðinu í deildinni.
Hinn sautján ára gamli Ísak lagði ekki bara upp mörkin tvö með glæsilegri frammistöðu því hann gaf sjö sendingar sem sköpuðu færi og 92,6 prósent allra sendinga sem hann reyndi heppnuðust.
Ísak var fyrr á árinu valinn efnilegasti leikmaður deildarinnar í úttekt Aftonbladet og virðist hann ætla að standa undir því á tímabilinu.
Strákurinn spilaði einn leik í 1. deild með ÍA áður en hann hélt utan en hann hefur skorað ellefu mörk í 21 leik með yngri landsliðum Íslands.